Femnas, òmes, pichons e pichonas d’òc, cossí anatz ?
Sèm lo dimars 6 de genièr, amb lo solelh que brilha e lo frèj que pica, mas las temperaturas negativas nos escanan pas tròp lo còr. E aquò, pas de panica: Ràdio Lengadoc es aquí per vos calfar!
Dins nòstre Miègjornau d’uèi, començarem amb Pèire Costa, director de Regions e Pobles Solidaris. Ven de tornar d’un viatge en Nòva Caledonia e nos contarà lo rescontre amb los representants politics del pòble Kanak.
Puèi, plaça al Cafè Occitan de Pompinhan amb sa presidenta Verònica Fiol, que nos parlarà del cafè occitan d’aqueste ser e de la projeccion del film Lo Complèxe del Santon.
Per acabar, nos desplaçarem a Nimes ont Ràdio Lengadoc se fa ausir sus la DAB+ per rescontrar Patric Lapierre de la Marpoc, que nos convidarà al teatre e a l’universitat.
En musica, vos aurèm lo cantaire Kanak Gulan amb lo cant tradicional Nodei Perofeta, Coriandre e lo Grop Masc.
Esperam que lo somari d’aquesta edicion vos faga plaser. Mercés per vòstra escota, e ara passarem a las actualitats!