Femnas, òmes, pichonets e pichonetas, cossí anatz ?
Lo Miègjornau d’aqueste dijòus 27 de novembre de 2025 vos prepausa un programa plan variat !
D’en primièr, Patric Lapierre nos parla dempuèi Nimes per anonciar lo cafè occitan d’Alès, previst lo dimars 2 de decembre. Será tanben l’ocasion d’abordar la cinquantena edicion de l’Universitat Occitana d’Estiu, que se tendrà del 2 al 5 de julhet de 2026.
Puèi, Luc Azaïs, de l’associacion Tafanari, nos presentarà la novèla edicion de la Setmana Calabresa, que se debanarà del 4 al 7 de decembre dins lo país de l’Orb e a l’entorn.
Per clavar lo viatge, partirem cap a Besièrs amb Sandra Juan, cargada de cooperacion al CIRDÒC, que nos balharà las darrièras actualitats de la Mediatèca Occitana.
En musica, una seleccion 100 % femnas de la nòva cançon occitana : Marie Rouanet, Rosina de Pèira e Martina e Jacmelina.