Revista radiofonica realizada en partenariat amb Ràdio Occitania, Ràdio País, Ràdio Albigés, Ràdio Nissa Pantai e Ràdio Cultura del Brasil.
Actualitats d’Occitania
Danís CHAPDUELH
Lo cap de redaccion de la revista LoDiari nos balha d’unas informacions a l’entorn de l’edicion 78 . D’aquesta passa la còla botèt l’agache sus Provença e dos representants del parçan : Marcel Pagnol e Massilia Sound System. De podcasts novèls tanben son prepausats e mantun biais de s’abonar. Lo contengunt del siti es ric e vos podètz regalar lodiari.com
Cati ESCAMEZ
La formatritz en lenga e cultura occitanas nos convida per l’Estagi Parlar que se tendrà los 09, 10 e 11 d’abril al CFPO – Centre de Formacion Professionala Occitan a Besièrs. Lo tèma d’aqueste còp serà Lo Teatre e los talhièrs son desvolopats per un public de nivèl B1, B2 e C1. Per aver lo tot plen d’informacions cfpoccitan.org
Daniel LODDO
L’associacion La Talvera es estada creada en octobre de 1979. Dempuèi 45 ans òbra per la conservacion e a la valorizacion del patrimòni cultural occitan. Un projècte novèl se ditz Lo Castèl Encantaire. Serà un musèu, un luòc de rescontre, de residéncia e de sauvagarda del patrimòni musical occitan. Lo Daniel fa una crida a las personas qu’an d’instruments de musica, de partituras o de testimònis de contar per enriqusir lo patrimòni del musèu.